Aus het es Änd, nume d’Wurscht het zwöi…

Mit dene Wort het üse Fankhauser Christian geschter nach dr Prob mitteilt, dass das die letschti aktivi Singprob mit sire Beteiligung sig gsy.

Mir aui hei genau gwüsst, dass dä Momänt wird cho, di Gsundheit het lenger wie meh es unbeschwärts Singe nümmemeh zueglah. Dä Entscheid hesch Du dir nid liecht gmacht, u mir reschpäktiere das.

Über 27 Jahr lang hesch Du mit dire wunderschöne Stimm dr erscht Tenor ungerschtützt, u dr zweit Jutz isch dür di prägt worde, wie chuum je dür öpperem. Unvergässe blibe au die schöne Stunge, wo mir mit dir hei dörfe ha. Dr Höhepunkt isch sicherlech dr Uftritt am Eidgenössische z’Luzärn gsy, wo mir mit «z’Alp» dr wou bescht Uftritt ir Gschicht vo üs Rohrbacher hei dörfe erläbe. Itze isch er auso da, dr Momänt, wo d’Lücke i dr hingere Reihe wird blibe.

Liebe Christian, mir Rohrbacher danke dir für die schöne Jahr u die vile unvergässleche Momänte. Schön, dass Du witerhin bi üs «zwüschiche wosch cho iche luege», das Du de dr Irène a de Zyschtige nid zfescht uf d’Närve geisch. Du wirsch i üsem Kreis gäng härzlech willkomme sy.

 

Diner Kamerade vo Rohrbach